සීයා ඔබ..

තුරුලට අරං දූ පැටියෝ කීව ඔබ
ජාතක කතා පොත කියලා දුන්න ඔබ
සොබා දහම කවියෙන් මට දුන්නු ඔබ
ඈතට ගියා මා තනිකර දමා ඔබ

පෝය දාට සිල් අරගෙන ආව ඔබ
දානෙට දුන්නු රස ආහාර ගෙනා ඔබ
දූ පැටියෝ මං ආවා කීව ඔබ
මා තනිකර හැංගුනාද කියන් ඔබ

ගං දිය සමග මා හා ගී කීව ඔබ
වෙල් ඉපනැල්ලේ දිව යන්නට ආව ඔබ
මාදං පේර ඔඩොක්කුවක් ගෙනා ඔබ
දුර ඈතට ඉගිලුනාද කොහේ ඔබ

හැන්දෑවට කවි බණ පද කීව ඔබ
පෝයදාට පායන පුන් සදකි ඔබ
යලි කිසිදා මට දකින්න නොහැකි ඔබ
නිවන් යන්න පිං පිරුවා බොහෝ ඔබ

සුදු රැවුලයි මද සිනහයි හැඩට ඔබ
ජීවිතයම කවියෙන් මට කීව ඔබ
මා හැර දමා හැංගීලා ගියා ඔබ
මං ආදරෙයි හැමදාමත් සීයා ඔබ..

වැහිලිහිනි...